MAHALLIY YANGILIKLAR

2026-yil 29-mart kuni soat 07:00 da O‘zbekistonning eng shimoliy shahri — Nukusning markaziy ko‘chalarida Silk Road xalqaro loyihasining yugurish tadbirlari turkumiga start beriladi. Dasturga 10 va 5 km masofalarga mo‘ljallangan Silk Road Nukus ommaviy yugurish musobaqalari, Talaba Yugur talabalar starti, nogironligi bo‘lgan shaxslar ishtirokidagi Inson Uchun inklyuziv ommaviy yugurish musobaqasi hamda 500 va 250 metr masofalarda Kids Run bolalar ommaviy yugurish musobaqalari kiritilgan.

Tadbirda 2000 nafarga yaqin kishi ishtirok etishi kutilmoqda. Qatnashchilarning asosiy qismini viloyat aholisi – maktab o‘quvchilari, talabalar va yugurish havaskorlari, shuningdek, O‘zbekistonning boshqa shaharlari hamda xorijiy mamlakatlardan tashrif buyurgan professional sportchilar va yugurish klublari vakillari tashkil qiladi.

O‘tgan yili start olgan Silk Road Uzbekistan xalqaro ommaviy yugurish musobaqalari turkumi ommaviy sportni Buyuk Ipak yo‘lining madaniy-tarixiy merosini ommalashtirish bilan birlashtiradi. 2026-yil mavsumidagi turkum mamlakatning sakkizta shahrida bo‘lib o‘tadi: start 29-mart kuni Nukusda bo‘lib o‘tadi, so‘ngra ommaviy yugurish musobaqalari Samarqand (26-aprel), Toshkent (24-may), Qo‘qon (7-iyun) va Buxoroda (14-iyun) bo‘lib o‘tadi. Kalendarning kuzgi qismini tadbirning Andijon (27-sentyabr) va Shahrisabz (18-oktyabr) shaharlaridagi bosqichlari davom ettiradi, 15-noyabr kuni esa Xiva shahridagi final starti bilan seriya yakunlanadi.

Nukus shahri hududi Buyuk Ipak yo‘lining muhim savdo markazlaridan biri bo‘lgan qadimiy Xorazm tarixi bilan chambarchas bog‘liqdir. O‘tmishda karvon yo‘llari uchun asosiy mo‘ljal vazifasini o‘tagan Orol dengizi va Amudaryoning yaqinligi qoraqalpoq xalqi madaniyati, san’ati, me’morchiligi hamda an’anaviy turmush tarzida o‘zining sezilarli izini qoldirgan.

Zamonaviy Nukus hududning katta ahamiyatga sazovor madaniy markazi sifatida ham mashhur. Bu yerda jahon miqyosidagi avangard san’ati asarlarining noyob to‘plamiga ega Igor Savitskiy nomidagi Davlat san’at muzeyi hamda Berdaq nomidagi Qoraqalpoq adabiyoti tarixi muzeyi joylashgan.

Silk Road Nukus ommaviy yugurish musobaqalari marshruti shahar markaziy ko‘chalari bo‘ylab o‘tib, asosiy manzillarni, jumladan, Qoraqalpog‘iston poytaxtining diqqatga sazovor joylaridan biri bo‘lgan Davlat bayrog‘i maydonini qamrab oladi. Ushbu maydonda O‘zbekiston va Qoraqalpog‘iston davlat bayroqlari o‘rnatilgan 55 metrlik ikkita flagshtok mavjud.

“Yugurish ixlosmandlari va yugurish klublari a’zolari uchun Nukus shahri yugurish musobaqalari xaritasidagi eng g‘aroyib va esda qolarli manzillardan biriga aylanishi mumkin, — deya ta’kidladi Markaziy Osiyo yurish va yugurish akademiyasi direktori Shuhrat Usmonov. — Silk Road ommaviy yugurish musobaqalari turkumi hamda O‘zbekistondagi bir qator yirik ommaviy yugurish tadbirlarining tashkilotchisi bo‘lgan Markaziy Osiyo yurish va yugurish akademiyasi havaskorlar yugurishi infratuzilmasini izchil rivojlantirib, startlar geografiyasini kengaytirib bormoqda. Shahar landshafti va ommaviy yugurish musobaqasi yo‘nalishi, ayniqsa, bahorda mo‘tadil ob-havo yirik sport tadbirlarini o‘tkazishga imkon beradigan pallada shaxsiy rekordlarni yangilash uchun qulay sharoit yaratadi. Biz yuguruvchilarni va hudud aholisini bahor ayyomi — Navro‘zni Silk Road ommaviy yugurish musobaqasida ishtirok etish orqali nishonlashga, Nukusni yangi yuguruvchilar shahri sifatida kashf etishga hamda Qoraqalpog‘istonning boy tarixiy merosi bilan tanishishga chorlaymiz”.

Tadbir dasturidan Qoraqalpog‘iston Respublikasi oliy va o‘rta maxsus ta’lim muassasalari talabalari o‘rtasida ommaviy sportni rivojlantirishga qaratilgan Talaba Yugur talabalar yugurish musobaqasining navbatdagi respublika bosqichi ham o‘rin olgan. Talabalar ommaviy yugurish musobaqalarining tashkilotchisi sifatida Oliy ta’lim, fan va innovatsiyalar vazirligi ishtirok etmoqda.

Bundan tashqari, Ijtimoiy himoya milliy agentligi hamda Adaptiv sport turlari assotsiatsiyasi tashabbusi bilan Inson Uchun inklyuziv xayriya ommaviy yugurish musobaqasi o‘tkaziladi. Tadbirning maqsadi nogironligi bo‘lgan shaxslar uchun qulay sport tamoyillarini va ularning ijtimoiy integratsiyasini targ‘ib qilishga qaratilgan.

Silk Road Nukus g‘olib va sovrindorlari uchun erkaklar va ayollar o‘rtasida 5 va 10 km masofalarda sovrin jamg‘armasi ko‘zda tutilgan.

10 km:

• 1-o‘rin - 6 mln so‘m
• 2-o‘rin - 5 mln so‘m
• 3-o‘rin - 4 mln so‘m

5 km:

• 1-o‘rin - 3,5 mln so‘m
• 2-o‘rin - 3 mln so‘m
• 3-o‘rin - 2,5 mln so‘m

250 va 500 metr masofalarga o‘tkaziladigan Kids Run bolalar ommaviy yugurish musobaqalarining g‘olib va sovrindorlari tashkiliy qo‘mita hamda tadbir hamkorlari tomonidan qimmatbaho sovg‘alar bilan taqdirlanadi. Start to‘plamlari narxi tanlangan masofaga qarab 100 000 so‘mdan 200 000 so‘mgachani tashkil etadi. Start to‘plamlari 27 va 28-mart kunlari tarqatiladi.

Ishtirokchining start to‘plamiga quyidagilar kiradi:

• maxsus futbolka
• kepka
• chip va to‘g‘nog‘ichlar bilan start raqami
• ryukzak
• esdalik medali.

Hamkorlik platformasida ro‘yxatdan o‘tish boshlandi:

https://perfend.com/en/events/sport/silkroad-nukus

Silk Road xalqaro ommaviy yugurish musobaqasiga qo‘shiling va tobora rivojlanayotgan O‘zbekiston sport harakatining bir qismiga aylaning.

Xabaringiz bor, joriy yilning 5-aprel kuni poytaxtimizda "Navro‘z" umumxalq bayrami munosabati bilan "Toshkent xalqaro marafoni"ni bo‘lib o‘tadi. Marafonga tayyorgarlik ko‘rish va uni yuqori saviyada o‘tkazish maqsadida haftaning har juma kuni Ishchi guruhning yig‘ilishi o‘tkazib kelinmoqda.  

Bugun Yengil atletika federatsiyasida tashkil etilgan navbatdagi yig‘ilishda ommaviy yugurush musobaqasini o‘tkazish bo‘yicha chora-tadbirlar rejasida belgilangan topshiriqlar ijrosi muhokama qilindi. Jumladan, marafon o‘tkaziladigan hududlarda jamoat xavfsizligini ta’minlash, huquq-tartibot organlari, tibbiy xizmat va favqulodda vaziyatlar xizmatlari tomonidan amalga oshirilayotgan ishlar ko‘rib chiqildi. Shuningdek, media-reja, ommaviy axborot vositalari orqali targ‘ibot, marafonning turistik va boshqa ahamiyatining yoritilishi masalalari ham kun tartibidan o‘rin oldi. 

Joriy yilning 1-martidan boshlab tadbirning sahnalashtirilgan tayyorgarlik mashqini (repetisiya) o‘tkazilishi rejalashtirildi  Yig‘ilish yakunida ko‘rilayotgan chora-tadbirlarni yanada jadallashtirish bo‘yicha tegishli vazifalar belgilab berildi.

2026-yil 5-aprel kuni poytaxtimiz Toshkentda Navro‘z umumxalq bayrami munosabati bilan an’anaviy VIII Toshkent xalqaro marafoni bo‘lib o‘tadi.

Sakkizinchi yil ketma-ket o‘tkazilayotgan mazkur nufuzli sport tadbiri bugungi kunda mamlakatimizning eng yirik sport tadbirlaridan biri hisoblanadi. Unda dunyoning 30 dan ortiq davlatidan 15 000 nafardan ziyod ishtirokchi kutilmoqda.

Marafon World Athletics tomonidan beriladigan “World Athletics Label” maqomiga ega nufuzli xalqaro sport tadbiridir. Xalqaro marafonda qayd etilgan natijalar World Athletics tomonidan tan olinadi.

Tadbir tashkilotchilari:

— O‘zbekiston Respublikasi Sport vazirligi
— O‘zbekiston yengil atletika federatsiyasi
— ProRun kompaniyasi

🏁 Marafon yo‘nalishlari:

• 42 km – Klassik marafon
• 21 km – Yarim marafon
• 10 km
• 5 km – Fun Run
• Nogironligi bo‘lganlar o‘rtasida alohida musobaqalar tashkil etilishi rejalashtirilgan.

Xalqaro marafonda professional sportchilar ham, havaskor yuguruvchilar ham ishtirok etishlari mumkin.

⸻

🎉 Ochilish marosimi:

📍HUMO Arena
🗓4-aprel 2026
🕖Soat 19:00

Dasturda:

— Xalqaro ishtirokchilar paradi
— Bayramona konsert dasturi
— Salyut

Barcha muxlislar uchun ochiq!

Start paketi:

Har bir ishtirokchi quyidagilarga ega bo‘ladi:

Start raqami;
Elektron xronometraj chipi;
Musobaqaning maxsus futbolkasi;
Finishchi medali;
Trassada suv va ovqatlanish;
Elektron sertifikat va rasmiy natija;

💵Ishtirok narxi: 300 000 so‘m

📆Tadbir dasturi:

4-aprel (shanba) – HUMO Arena

17:00 – Bolalar yugurishi
19:00 – Ochilish marosimi
19:30 – Salyut
19:35–21:00 – Konsert

5-aprel (yakshanba)

05:00 – Musobaqa ishtirokchilarining to’planish to’planish vaqti
06:00 – 42 km start
07:30 – 21 km start
09:00 – 10 km start
10:00 – Taqdirlash marosimi
11:00 – 5 km start
12:00 – Yopilish marosimi

Marafonning start va finish nuqtalari HUMO Arena maydonida joylashadi. Musobaqa ishtirokchilari belgilangan masofani Toshkent shahrining quydagi ko‘chalari bo‘ylab bosib o‘tadi:

START: Afrosiyob ko‘chasi ⟶ Islom Karimov ko‘chasi ⟶ Sharof Rashidov ko‘chasi ⟶ Shahrisabz ko‘chasi ⟶ Oybek ko‘chasi ⟶ Nukus ko‘chasi ⟶ Abdulla Qodiriy ko‘chasi ⟶ Beshyog‘och ko‘chasi ⟶ FINISH: Afrosiyob ko‘chasi.

🏆 Mukofot jamg‘armasi:

42 km:
🥇 48 000 000 so‘m
🥈 36 000 000 so‘m
🥉 24 000 000 so‘m

21 km:
🥇 12 000 000 so‘m
🥈 9 000 000 so‘m
🥉 7 000 000 so‘m

10 km:
🥇 7 000 000 so‘m
🥈 6 000 000 so‘m
🥉 4 000 000 so‘m

5 km:
🥇 3 000 000 so‘m
🥈 2 000 000 so‘m
🥉 1 000 000 so‘m

➡️ Ro‘yxatdan o‘tish: ProRun.uz yoki @prorunuzbot

🖥 Qo‘shimcha ma'lumotlar uchun havola

🔴 VIII International Tashkent Marathon — bu sport, sog‘lom turmush tarzi va bayram kayfiyatini o’zida birlashtirgan yirik xalqaro tadbirdir. 

Barchangizni ushbu sport bayramida faol ishtirok etishga chorlab qolamiz!

Joriy yilning 5 aprel kuni poytaxtimizda Navro‘z umumxalq bayrami munosabati bilan VIII International Tashkent Marathon ommaviy yugurish musobaqasi bo‘lib o‘tadi.

Mazkur yirik sport tadbiri O‘zbekiston Milliy Olimpiya qo‘mitasi, Sport vazirligi, Oliy ta’lim, fan va innovatsiyalar vazirligi, Yengil atletika federatsiyasi, “ProRun” kompaniyasi hamda hamkor tashkilotlar bilan hamkorlikda tashkil etilmoqda. Musobaqada dunyoning 30 dan ortiq davlatidan 15 000 nafardan ziyod ishtirokchi qatnashishi kutilmoqda.

O‘zbekiston yengil atletika federatsiyasida Sport vaziri o‘rinbosari Shahrullo Mahmudov rahbarligida ushbu ommaviy musobaqaga tayyorgarlik yuzasidan yig‘ilish o‘tkazildi. Yig‘ilishda, avvalo, 2025 yil davomida Yengil atletika federatsiyasi tomonidan tashkil etilgan ommaviy sport tadbirlari haqida axborot berildi.

Shundan so‘ng, xalqaro marafonga tayyorgarlik jarayonlari, belgilangan vazifalar ijrosini ta’minlash, tashkiliy masalalarni muvofiqlashtirish kabi dolzarb masalalar muhokama qilindi. Tadbir ishtirokchilari ro‘yxatdan o‘tish tartibi, bellashuvlar poytaxtning qaysi ko‘chalari bo‘ylab o‘tkazilishi, xavfsizlik choralari, tibbiy xizmat ko‘rsatish va boshqa tashkiliy jihatlar yuzasidan o‘zlarini qiziqtirgan savollarga javob oldilar.

Ma’lumot uchun, Toshkent xalqaro marafoni O‘zbekistonda “World Athletics Label” maqomiga ega bo‘lgan nufuzli xalqaro sport tadbiri hisoblanadi. Marafon dasturidan 42 km klassik marafon, 21 km yarim marafon, 10 km va 5 km Fun Run yugurish bahslari o‘rin olgan.
Shuningdek, nogironligi bo‘lgan sportchilar o‘rtasida ham alohida musobaqalar o‘tkazilishi rejalashtirilgan.

Yengil atletika federatsiyasi raisi maslahatchisi Kamoliddin Ruzmuxamedov, Navoiy viloyati Bojxona boshqarmasi bolshlig'i Azizbek Do'styorov, Sport maktabi direktori Sanjar Aslonov va boshqa mutasaddilar bilan Navoiy viloyat sportning o‘yin turlari va yengil atletikaga ixtisoslashgan maktab tasarrufidagi Kimyogar stadionida olib borilayotgan qurilish va rekonstruksiya ishlari, yengil atletika bilan shug‘ullanish uchun yaratilgan shart-sharoitlarni atroflicha ko‘zdan kechirdi.

Shuningdek, sportchilarga qaratilayotgan e’tibor, yengil atletikani yanada rivojlantirish, istiqboldagi ustuvor vazifalar bo‘yicha fikr-mulohazalar almashildi.

Yengil atletika federatsiyasi raisi o’rinbosari Nizomjon To’xtaboyev Toshkent viloyati Yangiobod shaharchasida joylashgan “Dukent” sport bazasida o’quv-yig’in mashg’ulotlarini olib borayotgan terma jamoa a’zolari bilan suhbatlashdi. Suhbat davomida sportchilarning muammolari, ularga yartilgan sharoitlar o’rganildi va oldinda turgan nufuzli musobaqalarga puxta tayyorgarlik ko’rish kerakligi ta’kidlandi.

Xabaringiz bor, Qoraqalpog’iston Respublikasi sport vazirligi, O‘zbekiston Yengil atletika federatsiyasi  bilan hamkorlikda xorijlik tajribali murabbiylar tomonidan yengil atletika yo‘nalishida faoliyat olib borayotgan trener va mutaxassislar uchun  va talabalari uchun  2 kunlik ilmiy-amaliy seminar tashkil etildi.

Seminarning 2-kunida ishtirokchilarga Rossiya Federatsiyasidan kelgan Rossiyada xizmat ko‘rsatgan murabbiy Nikolay Kolodko yengil atletikaning uloqtirish turlarini rivojlantirish
 bo‘yicha zamonaviy metodikalari, Xalqaro darajadagi sport ustasi Sergey Dementev esa "Yengil atletikaning qisqa masofaga yugurish turlarini rivojlantirishning zamonaviy usullari bo'yicha mahorat darslari o'tishdi.

Nukus shahridagi Olimpiya va Paralimpiya sport turlariga tayyorlash markazi hamda O‘zbekiston davlat jismoniy tarbiya va sport universiteti Nukus filialida yengil atletika yo‘nalishida faoliyat olib borayotgan murabbiy va mutaxassislar uchun 2 kunlik ilmiy-amaliy seminar tashkil etildi.

 Tadbirning dastlabki kuni nazariy mashg‘ulotlar bilan boshlandi. Unda Qoraqalpog‘iston Respublikasi sport vaziri E. Qutibaev hududda yengil atletikani rivojlantirish bo‘yicha amalga oshirilayotgan chora-tadbirlar haqida to‘xtalib o‘tdi.

 Shuningdek, O‘zbekiston Yengil atletika federatsiyasi raisi o‘rinbosari Nizomjon To‘xtaboyev “Prezident olimpiadasi” va xalqaro musobaqalar, Olimpiya va Paralimpiya o‘yinlari, Osiyo va Paraosiyo o‘yinlari, Jahon va Osiyo chempionatlari hamda O‘zbekiston chempionati va kuboklarida sportchilarning ishtirokini samarali tashkil etish bo‘yicha tavsiya va ko‘rsatmalar berdi.

Seminar davomida Rossiya Federatsiyasidan tashrif buyurgan mutaxassislar Sergey Dementev va Nikolay Kolodko tomonidan yengil atletikaning uloqtirish hamda qisqa masofalarga yugurish turlarini rivojlantirishga oid zamonaviy metodika va usullar yuzasidan ma’ruzalar o‘qildi.

Bugun Islom Karimov nomidagi Toshkent xalqaro aeroportida Xitoyning Tianjin shahri mezbonlik qilgan 12-yopiq inshootda yengil atletika bo‘yicha kattalar o‘rtasida Osiyo Chempionatida muvaffaqiyatli ishtirok etib, jami 4 medal bilan jamoaviy hisobda beshinchi o‘rinda musobaqani yakunlagan O‘zbekiston delegatsiyasi tantanali kutib olindi.

Kutib olish marosimida O‘zbekiston yengil atletika federatsiyasi rais o‘rinbosari Otabek Choriyev, federatsiya jamoasi, atletlarning yaqin qarindoshlari va do‘stlari hamda Davlat bojxona qo‘mitasi xodimlari g‘olib va sovrindorlarni qutladi.

Tianjinda Osiyo Chempionatidagi yuksak natijalar mamlakatimizda yengil atletika rivojida yangi sahifa bo‘ldi. Qit'aning eng tezkor va kuchli sportchilari bilan tengma teng kurash olib borgan O‘zbekiston atletlari 3 ta oltin va 1 ta kumush medalni qo‘lga kiritdi.

Bugun 22-yanvar sanasida O‘zbekiston yengil atletika federatsiyasida Renessans ta'lim universiteti Pedagogika fakulteti, Sport faoliyati kafedrasi professor o‘qituvchilari — falsafa doktori (PhD), dotsent va kurash bo‘yicha jahon chempioni Z.S.Artiqov, falsafa doktori (PhD), professor v.b. X.X.Umarov va  professor U.R.Radjapov  ishtirokida universitetda tahsil olayotgan talabalar uchun maxsus o‘quv seminar tashkil etildi.

O‘quv seminarida federatsiya rais o‘rinbosari N.T.To‘xtaboyev va bosh kotib D.I.Avazov ishtirok etib, mamlakatimizda sportni shu jumladan, yengil atletika turini rivojlantirishda sport ta'limining o‘rni mavzusida talabalar bilan suhbat olib bordi. Mavzu bo‘yicha yengil atletika turlari bo‘yicha talabalarga amaliy misollar bilan sport ta'limi va amalda sport bilan shug‘ullanishning bog‘liqlik jihatlari ochib berildi. 

So‘nggi yillarda o‘zbek sportida erishilayotgan ulkan g‘alabalarda sport ilmiy jihatdan o‘rganish hamda natijalarni amaliyotga tatbiq etishni o‘rni beqiyos. 

Silk Run Andijan xalqaro ommaviy yugurish musobaqasi ishtirokchilarini O‘zbekistonda yugurish harakatini qo‘llab-quvvatlash va rivojlantirish maqsadida tashkilotchilar tomonidan ajratilgan katta sovrin jamg‘armasi kutmoqda!

Sovrin jamg‘armasining umumiy miqdori 165 million so‘mni tashkil etadi!

5, 10 va 21 km masofalarda hamda Shimoliy yurish bo‘yicha barcha g‘oliblar 1 million so‘mdan 12 million so‘mgacha pul mukofotlari bilan taqdirlanadi.

Kids Run g‘oliblari homiylardan sovg‘alar va hadyalar olishadi. 

Yugurish ishqibozlarini rag‘batlantirish va qo‘llab-quvvatlash uchun 50 yoshdan 80 yoshdan yuqori bo‘lgan yosh toifalari ham kiritilgan.

Ishtirok eting va perfend.com saytida ro‘yxatdan o‘ting.

Bugun O‘zbekiston yengil atletika federatsiyasida federatsiyasi rahbariyati vakili, sport faxriysi hamda Olimpiada va jahon chempioni Andrey Xakimovich Abduvaliyev sharafiga bag‘ishlangan tantanali tadbir bo‘lib o‘tdi. O‘zbekiston sporti afsonasi federatsiya tarkibida murabbiy sifatida sportchilarni nufuzli musobaqalarga tayyorlashda davom etishini maʼlum qildi. Tadbirda federatsiya raisi o‘rinbosarlari O.Choriyev va K.Usmonov so‘zga chiqib, Andrey Abduvaliyevga sportchilarimizni xalqaro maydonda qo‘lga kiritayotgan yutuqlarida katta hissasi borligini taʼkidladi va buning uchun minnadorchilik bildirdi.

Andrey Hakimovich Abduvaliyev 1966-yil 30-iyun kuni tug‘ilgan. Yengil atletikaning bosqon uloqtirish yo‘nalishi bo‘yicha Barselona—1992 Olimpiya o‘yinlari chempioni. Shuningdek, 1993-yil Shtutgart va 1995-yil Gyoteborgda o‘tgan jahon chempionatlari g‘olibi, Osiyo chempioni va Osiyo o‘yinlari sovrindori ham sanaladi.

2018-yil O‘zbekiston yengil atletika federatsiyasi raisi lavozimiga konferensiya yig‘ilishida saylandi. U 2001—2012-yillar davomida O‘zbekiston milliy terma jamoasining yengil atletika turi bo‘yicha bosh murabbiyi, O‘zbekiston yengil atletika federatsiyasi bosh kotibi lavozimlarida faoliyat yuritgan.

2019-yil Yengil atletika bo‘yicha Respublika oliy sport mahorati maktabiga direktor lavozimiga shu bilan birga, mazkur yili Osiyo yengil atletika federatsiyalari assotsiatsiyasi vitse-prezidenti lavozimiga saylandi.

2021-yil davlatimiz tomonidan “Sodiq xizmatlari uchun” medali bilan taqdirlangan.

Murabbiylik faoliyati davomida tayyorlagan bir qator malakali sportchilar respublika va xalqaro musobaqalarda muvaffaqiyatli ishtirok etib, vatanimiz sharafini munosib himoya qilib kelmoqdalar.

Maktabda direktorlik faoliyati davomida ham sportchilarni qo‘llab-quvvatlagan holda nufuzli musobaqalarga munosib tayyorgarlik ko‘rishlari uchun barcha shart-sharoitlar yaratib berishda jonbozlik ko‘rsatib kelgan. 2019-yil Qatarning Doha shahrida o‘tkazilgan Osiyo Chempionatida N.Dusanova, E.Voronina va R.Kurbanov oltin medallar, S.Radzivil va S.Xodjayev bronza medallarni qo‘lga kiritdilar. N.Sharipova, S.Erkinova, R.Xudoyarova va I.Markelov final bosqichida kuchlik o‘ntalikdan o‘rin oldilar.

Xizmat ko‘rsatgan sport ustasi unvonini qo‘lga kiritgan Andrey Abduvaliyev 2000-yilda sportchilik faoliyatini tugatgan. Bir necha yil mamlakat yengil atletika federatsiyasi raisi sifatida samarali mehnat qilgan. Hozirda O‘zbekiston yengil atletika federatsiyasi raisining o‘rinbosari va Osiyo yengil atletika assotsiatsiyasi vitse-prezidenti lavozimlarida ish olib bormoqda. Hozirgi kunda Andrey Abduvaliyev Markaziy Osiyo Assotsiatsiya Prezidenti sifatida tayinlandi. 2027-yil yakuniga qadar Osiyo Assotsiatsiyasi vitse-prezidenti lavozimida o‘z faoliyatini olib boradi.

“Sodiq xizmatlari uchun” medali bilan taqdirlangan, oliy toifali trener hisoblanadi.

Yuqoridagi natijalar A.Abduvaliyevning sport sohasidagi bilim va amaliy tajribasi naqadar yuksak ekaniga dalolat beradi. Uning tashabbuskorligi va zimmasiga yuklatilgan vazifalarni vijdonan ado etishi bilan mamlakatimiz sportini rivojiga o‘zining munosib hissasini qo‘shib kelayotgan fidoyilardan biridir. Andrey Abduvaliyev maʼnaviy-maʼrifiy ishlarni tashkil etishda yuksak madaniyat egasi, chuqur tafakkurli va kamtarin, to‘g‘ri so‘z, mehribon va qatʼiyatli inson ekani bilan barchaning hurmati va mehrini qozondi.

           Yillar davomida olib borilgan rahbarlik faoliyati uchun Andrey Abduvaliyevga minnatdorchilik bildiramiz va yurtimizda yengil atletika sportini rivojlantirish yo‘lida hamisha bir jamoa bo‘lib qolamiz, degan umiddamiz.

O‘zbekiston yengil atletika federatsiyasida navbatdan tashqari o‘tkazilgan konferensiya kun tartibidan muhim masalalar o‘rin oldi. O‘zbekiston yengil atletika federatsiyasi rais o‘rinbosari K.A.Usmonov konferensiya avvalida yig‘ilish kun tartibida turgan muhim masalalarni e‘lon qildi

Muhokama qilingan masalalar doirasida federatsiya tomonidan joriy yilning o‘tgan davrida amalga oshirilgan ishlar va kelgusidagi vazifalar yuzasidan rais o‘rinbosari O.Choriyevning ma’lumotlari tinglandi. Yil davomida sohada erishilgan yutuqlar e’tirof etildi va tegishli xulosalar chiqarildi. Shuningdek, konferensiya davomida Federatsiya Ustavining yangi tahririni muhokama qilindi va tasdiqlandi

Yangi tahrirdagi ustavga ko‘ra, Federatsiya Boshqaruv kengashi tarkibi quyidagicha bo‘ldi:

1. Mavlonov Akmalxo‘ja Yusupovich — Federatsiya raisi, Boshqaruv kengashi raisi.
2. Choriyev Otabek Bobomuratovich — Federatsiya raisi o‘rinbosari, Boshqaruv kengashi raisi o‘rinbosari.
3. Usmonov Kamoliddin Aloviddin o‘g‘li — Federatsiya raisi o‘rinbosari, Boshqaruv kengashi a’zosi.
4. Abduvaliyev Andrey Xakimovich — Federatsiya raisi o‘rinbosari, Boshqaruv kengashi a’zosi.
5. Avazov Dilshod Ismoil o‘g‘li — Federatsiya Bosh kotibi, Boshqaruv kengashi a’zosi.
6. Xubbiyeva Guzel Shavkatovna — Federatsiya Bosh treneri, Boshqaruv kengashi a’zosi.
7. Shinibekova Elvira Jaxangarovna — Federatsiya milliy terma jamoalar faoliyatini koordinatsiya va monitoring bo‘yicha mutaxassisi, Boshqaruv kengashi a’zosi.
8. Mirsadikov Mirovoz Mirsakiyevich — Yengil atletika bo‘yicha Respublika Oliy sport mahorat maktabi treneri, Boshqaruv kengashi a’zosi.
9. Soliyev Iqror Roziqovich — O‘zbekiston davlat jismoniy tarbiya va sport universiteti mas’ul xodimi, Boshqaruv kengashi a’zosi.

    10. Ortiqov Xasanboy Tolipovich — Federatsiya hakamlar hay’ati raisi, Boshqaruv kengashi a’zosi.

Shuningdek, O‘zbekiston yengil atletika federatsiyasi xodimlar bilan ishlash inspektori Tashxodjayeva Diloram Sidikova Boshqaruv kengashi kotibi (ovoz berish huquqisiz).

Joriy yilning 25—26-sentabr kunlari O‘zbekiston yengil atletika federatsiyasi sport majmuasida U14 o‘rtasida O‘zbekiston Chempionati bo‘lib o‘tadi.

2011-yilda tug‘ilgan yoshlar va undan kichik o‘smirlar o‘rtasida O‘zbekiston Respublikasi Sport vazirligining Sport va ommaviy jismoniy tarbiya tadbirlarining 2025-yil uchun respublika kalendar rejasiga muvofiq mamlakat birinchiligi musobaqasi O‘zbekiston yengil atletika federatsiyasi sport majmuasida bo‘lib o‘tadi. O‘zbekiston chempionati mazkur yosh toifasida mamlakatimizning eng tezkor va kuchli atlet o‘smirlarini aniqlab beradi. Qolaversa, U14 yosh toifasidagi kichik o‘smirlar o‘zlarini katta musobaqalarda sinab ko‘rish imkoniga ega bo‘ladi. Musobaqalar yengil atletikaning quyidagi turlari bo‘yicha o‘tkaziladi:

24-sentabr kuni "Yangi O‘zbekiston" bog‘ida Toshkent shahri va Toshkent viloyatidan kelgan ishtirokchilarni bir vaqtning o‘zida uchta sport bayrami kutmoqda. Shu kuni "Talaba Yugur", "O‘quvchi Yugur" va "Eco Save Aral" yugurish musobaqalari Ommaviy yugurish musobaqalari yagona ligasi homiyligida o‘tkaziladi.

Toshkent shahridan kelgan ishtirokchilar uchun soat 08:30'da start beriladi, Toshkent viloyatidan kelgan qatnashuvchilar esa soat 11:30'da ommaviy yugurish sport bayramida ishtiroklarini boshlashadi.

Boshlang‘ich paketlar narxi — 59 900 so‘mdan 382 800 so‘mgacha.

Minimal paketga ko‘krak raqami va to‘g‘nag‘ichlar kiradi.

To‘liq paketda esa raqam, vaqtni qayd etish chipi, kepka, sumka, futbolka va finishchi medali bor.

Ro‘yxatdan o‘tgan har bir ishtirokchi o‘z natijasini Yugur.uz ilovasida ko‘rishi mumkin.

Ro‘yxatdan o‘tishga shoshiling va kuzning yorqin yugurish tadbirida ishtirok eting! RO‘YXATDAN O‘TISH

Kattalar o‘rtasida O‘zbekiston Ochiq Kubogi (Uzbekistan Cup Open) yengil atletikaning erkaklar va ayollar o‘rtasida 22 turi va 1 aralash yo‘nalishidan iborat dastur asosida o‘tkazildi. Musobaqada mamlakatimizning barcha viloyatlari va Qoraqalpog‘iston Respublikasidan kelgan sportchilar, shuningdek Qirg‘iziston va Tojikiston kabi qo‘shni davlatlar hamda Bahrayn, Quvayt va Qatar kabi xorijiy davlatlardan kelgan professional atletlar g‘oliblik uchun kurash olib bordi.

Mazkur musobaqa joriy yilda Bahrayn mezbonlik qiladigan yoshlar o‘rtasida Osiyo o‘yinlarida qatnashadigan O‘zbekiston terma jamoasi a'zolari imkoniyatlarini yana bir bor ko'zdan kechirib olish, shu bilan bir qatorda Saudiya Arabistoni poytaxti Ar-Riyodda bo‘lib o‘tadigan oltinchi Islom birdamligi o‘yinlariga terma jamoa tarkibini shakllantirish uchun muhim ahamiyat kasb etdi.

Ta'kidlash joizki, O‘zbekiston Ochiq Kubogi juda ko‘tarinki ruhda o‘tdi. Bunga musobaqa davomida qayd etilgan bir qator yuqori natijalar va rekordlar ham katta hissa qo‘shdi. Dastlab 100 metr va 400 metrga g‘ovlar osha yugurish bahslarida ishtirok etgan Shodiyona Raxmonova 41 yillik O‘zbekiston rekordini yangiladi. 400 metr masofani g‘ovlar osha bosib o‘tish musobaqasida Farg‘ona viloyati vakilasi Shodiyona Raxmonova 59.76 soniya qayd etgan holda 18 yoshgacha bo‘lgan ayol atletlar orasida eng tezkor ko‘rsatkichni o‘rnatdi. O‘zbekiston yengil atletika federatsiyasi rahbariyati Shodiyona Raxmonovani pul mukofoti bilan taqdirladi. 

Yana bir atletimiz Anastasiya Silchenkova uzoq masofaga yugurish turlari tarkibiga kiruvchi 5,000 metrga yugurish musobaqasida ishtirok etgan holda birinchi o‘rinni egalladi. Qizig‘i, Toshkent shahar vakilasi aynan o‘zi tomonidan joriy yilning 22-iyunida o‘rnatilgan rekord — 16:55.02'ni yanada yaxshilab 16:42.83 natija bilan 18 yoshgacha bo‘lgan ayol yengil atletika sportchilari o‘rtasida O‘zbekiston rekordini o‘rnatdi. O‘zbekiston yengil atletika federatsiyasi rahbariyati Anastasiya Silchenkovaga ham mukofot puli topshirdi. Yosh atletning qayd etgan natijasidan uning murabbiyi Z.Sh.Amirova xursandligini bildirdi. O‘zbekiston yengil atletika federatsiyasi rais o‘rinbosari Otabek Bobomuratovich Choriyev taqdirlash ma'rosimida bevosita ishtirok etib sportchi va uning murabbiyini yuksak natija bilan tabrikladi.

Ayollar o‘rtasida o‘rta masofaga yugurish turlari orasida 800 metrga yugurish bo‘yicha musobaqada Farg‘ona viloyatidan tashrif buyurgan Saboxat Saminjonova barcha raqiblaridan tezkor ekanini isbotladi va marra chizig‘iga birinchi bo‘lib yetib keldi. Uning ushbu masofani yugurib o‘tishi uchun sarflagan vaqti — 2:06.76 juda yuqori natija hisoblanadi. So‘nggi paytlarda bunday yuqori ko‘rsatkich qayd etilmagan edi. Yakunlangan O‘zbekiston Ochiq Kubogi mana shunday yorqin lahzalari bilan yodda qoladi.
 

17—18-sentabr kunlari O‘zbekiston yengil atletika federatsiyasi stadionida kattalar o‘rtasida O‘zbekiston Ochiq Kubogi (Uzbekistan Cup Open) musobaqasi bo‘lib o‘tdi. Yuksak saviyada tashkillashtirilgan va ko‘tarinki ruhda o‘tgan musobaqada yurtimizning kattalar toifasida eng tezkor va eng kuchli atletlari o‘zaro kurash olib bordi. O‘zbekistonlik professional atletlar qatorida xorijlik sportchilar ham o‘z imkoniyatlarini mazkur musobaqada yana bir bor sinovdan o‘tkazdi. Yengil atletikaning erkaklar va ayollar o‘rtasida 22 turi hamda 1 aralash yo‘nalishda g‘olib va sovrindorlar aniqlandi, diplom va medallar topshirildi, shuningdek oldinda turgan muhim xalqaro musobaqalar oldidan barcha atletlar o‘z jismoniy holatiga baho berib oldi.

Musobaqani tomosha qilish uchun yig‘ilganlar shiddatli kurashlar bilan birga hayratlanarli natijalarga ham guvoh bo‘lishdi. Xususan, 400 metr masofaga g‘ovlar osha yugurish bahslarida Farg‘ona viloyati vakilasi Shodiyona Raxmonova 59.79 soniya natija bilan 18 yoshgacha bo‘lgan ayol atletlar orasida O‘zbekiston rekordini o‘rnatdi. Ajablanarlisi, ushbu natija qariyb 41 yillik rekord yangilanishiga olib keldi. 400 metrga g‘ovlar osha yugurish musobaqasida Shodiyona eng yaqin ta'qibchisidan naqd 8 soniya tezroq marra chizig‘ini kesib o‘tdi(!). Mazkur natija tashkilotchilar va tomoshabinlar uchun musobaqani yanada ishtiyoq bilan o‘tkazishga turtki bo‘ldi. Ayniqsa, Shodiyona Raxmonovaning murabbiyi A.Karimov
va Farg‘ona viloyatidan kelgan ishtirokchilar yangilangan rekord va ajoyib natijadan mamnun ekanliklarini namoyish etishdi. Bu mamlakatimizda yengil atletika rivoji yo‘lida amalga oshirilayotgan islohotlarning mevalaridan biri bo‘ldi. Shuningdek, ushbu natija boshqa yosh sportchilarni yanada ko‘proq o‘z ustida ishlashga undadi hamda ularga mavjud rekordlarni yangilash, ulardan yaxshirog‘ini qayd etish imkonsiz emasligini yana bir bor isbotladi.

O‘z ustida tinimsiz ishlash va aniq maqsad yo‘lida bardavom bo‘lish, albatta bir kun o‘z so‘zini aytadi. Rekordchi atlet bu natija bilan cheklanib qolmasligini oldinda turgan Bahrayn davlatida bo‘lib o‘tishi rejalashtirilgan yoshlar o‘rtasida Osiyo o‘yinlarida munosib ishtirok etish niyatida ekanligini bildirdi.

O‘zbekiston yengil atletika federatsiyasi rahbariyati yuqori natijaga erishib rekordni yangilagan Shodiyona Rahmonovaga pul mukofoti topshirdi. Taqdirlash ma'rosimida federatsiya rais o‘rinbosari Otabek Bobomuratovich Choriyev bevosita ishtirok etib, atletni rekord natija bilan tabrikladi hamda kelgusida faoliyatiga omad tiladi. Shodiyona Rahmonovaning mamlakatimizda yengil atletika sporti rivoji uchun qo‘shgan hissasiga yuqori baho berdi.

Kattalar toifasida Respublikaning professional mahalliy atletlari bilan bir qatorda ko‘plab xorijlik yengil atletika sport ustalarini o‘zida jamlaydigan O‘zbekiston kubogi musobaqasining o‘tkazilishi an'anaviy tusga kirib ulgurgan. Bu yilgi musobaqada ham qatnashish istagini bildirgan xorijlik atletlar ham ko‘pchilikni tashkil etmoqda.

O‘zbekiston Respublikasi Sport vazirligining Sport va ommaviy jismoniy tarbiya tadbirlarining 2025-yil uchun respublika kalendar rejasiga muvofiq tashkil etilayotgan mazkur musobaqa turli viloyatlardan hamda Qoraqalpog‘iston Respublikasidan tashrif buyurgan atletlar uchun o‘z jismoniy imkoniyatlarini sinovdan o‘tkazish, xalqaro musobaqalar muhitida chiniqish va kamchiliklarni bartaraf etish uchun muhim ahamiyatga ega bo‘ladi.

 Musobaqa ikki kunlik reja asosida kunduzgi va kechki dasturlarga bo‘lingan holda o‘tkaziladi. Yengil atletika sport turlari bo‘yicha final bosqichi asosan kunning ikkinchi qismida o‘tkaziladi. G‘olib va sovrindorlarga diplomlar va medallar topshiriladi. Musobaqa tasdqilangan jadval asosida o‘tkaziladi.

O‘ZBEKISTON OCHIQ KUBOGI

Bugun yurtimiz atletlari orasida Anvar Anvarov musobaqadagi o‘z chiqishini amalga oshiradi. Vakilimiz 15-sentabrda chempionatning 3-kuni  kechki dasturda Toshkent vaqti bilan 15:30 da uzunlikka sakrash bahslari saralash bosqichida B guruhida final yo‘llanmasi uchun kurash olib boradi. Anvar Anvarov ayni paytda uzunlikka sakrash turi bo‘yicha jahon reytingida #13-o‘rinni egallab turibdi.

Uzunlikka sakrash bahslarida dunyoning 25 ta yengil atletika federatsiyalaridan 39 ta atlet medallar uchun kurashadi. 

Qayd etish joizki, erkaklar o‘rtasida uzunlikka sakrash musobaqasida Markaziy Osiyo mintaqasidan yagona ishtirokchi aynan yurtimiz vakili hisoblanadi. Shuningdek, Osiyo qit'asidan yana 7 nafar atlet — mezbon Yaponiyadan 3 nafar, Xitoydan 3 nafar va Hindistondan 1 nafar atlet g‘oliblik uchun urinishni amalga oshiradi.

 O‘zbekistonlik atletning ishtirokini online shaklda Jonli efidada tomosha qilish uchun World Athletics'ning rasmiy veb-sahifasida world athletics+ xizmatidan foydalanishingiz mumkin. Ma'lumot o‘rnida, mazkur xizmat hech qanday to‘lov talab qilmaydi, faqatgina elektron pochta orqali ro‘yxatdan o‘tish kifoya. Buning uchun ushbu havolaga o‘ting.

Tokio shahrida joylashgan Milliy stadionda bo‘lib o‘tayotgan Jahon Chempionatida uzunlikka sakrash turida g‘oliblikka da'vogar atletlar ro‘yxati bilan tanishib chiqishingiz mumkin.

Yaponiya poytaxti Tokio shahrida joylashgan Milliy stadionda bo‘lib o‘tadigan yengil atletika turlari bo‘yicha Jahon Chempionati startiga oz fursat qoldi. 

O‘zbekistonlik atletlar orasida birinchi bo‘lib — Shoxrux Davlatov musobaqadagi o‘z chiqishini amalga oshiradi. Vakilimiz 15-sentabrda chempionatning 3-kuni ertalabki dasturda Toshkent vaqti bilan tonggi 03:30 da marafon bahslari final bosqichida qatnashadi. Shohruh Davlatov ayni paytda marafon turi bo‘yicha jahon reytingida #425-o‘rinni egallab turibdi.

Marafon bahslarida dunyoning 47 ta yengil atletika federatsiyalaridan 96 ta atlet medallar uchun kurashadi. 

Qayd etish joizki, erkaklar o‘rtasida marafon musobaqasida Markaziy Osiyo mintaqasidan yagona ishtirokchi aynan yurtimiz vakili hisoblanadi. Shuningdek, Osiyo qit'asidan yana 10 nafar atlet — mezbon Yaponiyadan 4 nafar, Xitoydan 3 nafar, Mo‘g‘ilistondan 2 nafar va Janubiy Koreyadan 1 nafar atlet g‘oliblik uchun urinishni amalga oshiradi.

Marafon bahslarida qatnashadigan barcha atletlar ro‘yxati bilan tanishish uchun ushbu havolaga o‘ting.